Inahing Ibon

Sa dako roon

sa malagong sanga

ng punong kahoy

isang inahing ibon na humuhuni

umiindayog, umaaliw-iw

puno nang pagmamalasakit

hitik sa pagmamahal.

Sa dako rito, tatlong batang ibon

mga munting pakpak

kumukumpay sa kalawakan

ng mundong walang puwang

sa pagitan ng mga panganib

na hindi hadlang.

Dininig ang huni ng inang ibon,

tumalima sa gabay ang mga supling

lumipad tungo sa piling ng ina

kasabay ay awit nang pamimintuho,

isang banal na pagpapala

sa kanlungan ng kalinga.

Tula ni Kyn H. Firmalino

para kay Emma Marie P. Domingo

Sinulat noong ika-5 ng Setyembre, 2020

sa Lungsod ng Bacolod, Lalawigan ng

Negros Occidental, Pilipinas