Habagat sa Setyembre

Kumikiskis ang mga palaspas

ng kaniyugan, umaagasas sa awit,

gumegewang-gewang sa sayaw,

tangay ng lakas na may salikmata.

Ang walis na nakasabit sa dingding

kumukumpas kasabay nang dumaang

hangin, pinapalaspas ang alikabok

na nasilayan ng liwanag sa kislapmata.

Gayundin ang bulong ng mga isipan

mula sa haraya’t sapantaha na tinanggap

nang malugod na animo’y mga tanging

panauhin sa salas ng mga kamalayan,

biglang nagsilaho sa ulirat ng malikmata.

Tula ni Kyn H. Firmalino

Sinulat noong ika-27 ng Setyembre, 2020

sa Lungsod ng Bacolod, Lalawigan ng

Negros Occidental, Pilipinas